瘋人院


前美國中央情報局頭子和總統特離譜一場精采演出,全世界都以看好戲的心情在追看,好戲連場,好睇過超級猛片、連續劇集。只是,這場戲卻是在所有人頭上上演,入戲的演員有機會令全世界覆亡。在自然定律裏,羣體一定要有領袖,就算一巢蟻都要有蟻后,蜜蜂要有蜂后。只是,德國人選擇過希特勒,日本人選擇過東條英機,中國人選擇過毛先生,今日的美國人選擇是特離譜。這些人都有着特別想像力,他們發一個夢,全人類都要承擔他發夢的後果,慘絕人寰。

也許美國人太苦悶、太寂寞,要揀一個癲佬出嚟刺激吓,這癲佬最最拿手,係發神經,亦癲得好勻循,專揀比他弱小的盟友嚟開刀,第一個當災嘅係南邊嘅墨西哥,真係黑過墨斗,要起圍牆圍住佢。北邊嘅加拿大一樣唔放過,整個木材打重稅,打爛晒前政府訂落嚟大家促進繁榮嘅北美自由貿易協議。跟住又向歐洲盟友開刀,大鬧德國車侵佔美國市場,英國、法國、意大利都俾臉色佢哋睇。唯獨小小菲律賓睬佢都傻,去同中國合拍跳探戈舞,有水過水,冇水撲水過檔,上下其手,俾錢嗰個不妨叫老竇,自知小角色身份,小角色也可以演活一場戲呀。另一個小腳色更厲害,金正恩是也,死硬派共產黨獨裁者,將國家搞到民窮財盡,又衰得起,揸住飛彈、核彈亂舞,周邊國家人人頭痕頭大。美國佬打佢又唔係,唔打佢又唔係,呢一種唔平衡嘅平衡日日上演,如果是但一條友踩錯鋼線,諗落好牙煙。

瘋人院